Ukraina Prezidenti Petro Poroşenko ‘‘Bazı Ukraina qanuniy aktlarına, sıñır havfsızlığını temin etüv boyunca Ukraina qanunına deñişmelerni kirsetüv aqqında’’ Ukraina qanunını imzaladı.

Qanunnıñ yerine ketirilüvi vaqtınca işğal etilgen topraqlarına yaqın olğan rayonlarda ve Ukrainaniñ vaqtınca işğal etigen topraqlarına ve topraqlarından kiriş-çıqış nezaret noqtalarında memuriy cinayetlerge daa semereli qarşılıq köstermege imkân yaratır. Devlet sıñırında qanunsız migratsiyağa ve sıñır saasında başqa cinayetlerge qarşı Ukraina devlet sıñır hızmeti tarafından işletilgen tedbirlerni mükemmelestirmek içün qanunğa deñişmeler kirsetildi.

Bu cümleden, Ukraina Memuriy cinayetler kodeksine bir sıra deñişmeler kirsetildi, 2 yañı memuriy mesüliyet çeşiti qoşuldı. Bundan da ğayrı, devlet sıñırında qanunsız migratsiyağa ve sıñır saasında başqa cinayetlerge qarşı Ukraina devlet sıñır hızmeti tarafından işletilgen tedbirlerni mükemmelestirmek içün ‘‘Ukrainanıñ vaqtınca işğal etilgen topraqlarında vatandaşlarnıñ aq-uquqlarına ve serbestliklerine riayet etüv ve uquqiy tertip’’, ‘‘Ukraina Devlet sıñır hızmeti aqqında’’, ‘‘Yabancılarnıñ ve vatandaşlığı olmağan şahıslarnıñ uquqiy statusı’’, ‘‘«Qırım» serbest iqtisadiy zonanı teşkil etüv ve Ukrainanıñ vaqtınca işğal etilgen topraqlarında iqtisadiy faalietniñ hususiyetleri aqqında’’ Ukraina qanunlarına ilâveler qoşula.

Ukraina Prezidentiniñ Qırım MC Temsilciligi yuqarında qayd etilgen qanunlarnıñ yerine ketirilüvine vekâleti çerçivesinde qol tutacaq ve Qırımdan rusiye istilâsına qarşılıq kösterüv olaraq qanunlarğa riayet etüv ve olarnıñ işletilüvi boyunca Ukraina Prezidentini haberdar etecektir.