2018 senesi oraq (iyül) 24 künü Qalançaq rayon devlet memuriyetiniñ binasında Ukraina Prezidentiniñ Qırım MC Daimiy Temsilcisi Borıs Babinniñ yolbaşçılığında Ukrainanıñ vaqtınca işğal etilgen Qırım toprağınıñ aktual meselelerini çezüv boyunca iş gruppasınıñ nevbetteki ofisten tış toplaşuvı olıp keçti. İş gruppasınıñ oturışında üç rayon devlet memuriyetiniñ reberleri, Ukraina Milliy polisiniñ ve Ukraina havfsızlıq hızmetiniñ yolbaşçıları, Herson vilâyeti devlet memuriyetinde mütenasip idarelerniñ reberiyeti, icra akimiyeti territorial organlarınıñ ve öz-özüni idare etüv organlarınıñ vekilleri ve başqa meraqlanğan vekâletli şahıslar iştirak etti.

İş gruppasınıñ toplaşuvı esnasında körüşüvde bulunğanlar Qırımğa yaqın olğan rayonlarda Ukraina devlet sıñır hızmeti Azaq-Qaradeñiz idaresiniñ, Ukraina havfsızlıq hızmeti Qırım MC ve Aqyar şeeri boyunca Baş idaresiniñ, ve Ukraina Milliy Polisi Qırım MC ve Aqyar şeeri boyunca baş idaresiniñ şübelerini yerleştirüv maqsadınen idareler arasındaki işbirlikni, işğalci akimiyetniñ Qırımnı suv ve elektrik ile temin etmek ıntıluvlarına kompleks şekilde qarşılıq kösterüvniñ aktual ihtiyaclarını muzakere ettiler. ‘‘Qalançaq’’ ve ‘‘Çaplınka’’ KÇNN-nı abadanlaştıruv meselesi de muzakere etilip, bu KÇNN-lardaki ve olarnıñ etraflarındaki topraqnı qullanuv saasında vaziyet aydınlatıldı, bir kere daa ‘‘Qalançaq’’ KÇNN-na qadar avtobuslar vastasınen ve Vadım durağına qadar demiryol vastasınen qanuniy yolcu naqliyatını teşkil etüv meselesi muzakere etildi. Qırımlılarğa Qalançaq ve Novotroyitske qasabalarında memuriy hızmetlerni bere bilecek Memuriy hızmet merkezlerni teşkil etüvniñ istiqbali aydınlatıldı.