Vaqtınca işğal etilgen Ukraina topraqlarına kiriş ve işbu topraqlardan çıqış Tertibine resmiy vesiqaları (tehnikiy pasportı) olmağan naqliyat vastalarda vaqtınca işğal etilgen Qırım Muhtar Cumhuriyeti ve Aqyar şeeri topraqlarından çıqış hususında deñişmeler kirsetildi.

Ukraina Nazirler Şurası 2021 senesi qural aynıñ 26-da ”Ukraina Nazirler Şurasınıñ 2015 senesi ilk yaz ayınıñ 4-de 367 sanlı qararı ve 2019 senesi oraq ayınıñ 17-de 815 sanlı qararı ile qabul etilgen tertiplerge deñişmeler kirsetüv aqqında” qararı ile vaqtınca işğal etilgen Ukraina topraqlarına kiriş ve işbu topraqlardan çıqış Tertibine deñişmeler kirsetti.

Kirsetilgen deñişmelerge binaen, vaqtınca işğal etilgen topraqlarğa kiriş-çıqış nezaret etüv noqtasından (yol areketi Qaidelerine binaen А1, А, В sınıflarına ait olğan moped, mototsikl, yengil araba kibi) naqliyat vastalarını keçirmek içün naqliyat vastanıñ resmiy qayd vesiqası, naqliyat vastasınıñ saibi olmağan aydavcılar içün ise ”Notariat aqqında” Ukraina qanunına binaen notarial areketler kerçekleştirgen organ ya da şahıs tarafından tasdıqlanğan vekâletname mevcüt olmalıdır.

Naqliyat vastasınıñ resmiy qayd vesiqası coyulğan ya da tamamınen yıpranğan olsa, işbu naqliyat vastasınıñ saibi ya da naqliyat vastasını qanuniy şekilde idare etken şahıs, ya da olarnıñ qanuniy temsilcileri naqliyat vastasınıñ Ukraina topraqlarında qayd etilgenini tasdıqlağan resmiy qayd vesiqasınıñ kopiyası esasında vaqtınca işğal etilgen topraqtan işbu naqliyat vastasında bir kerelik çıqış yapa bilirler.

Naqliyat vastasına ait qayd etüv kâğıtınıñ kopiyası şahısnı tasdıqlağan, (temsilci vastasınen muracaat etilse ise) temsilciniñ şahısını tasdıqlağan vesiqa ve naqliyat vastasınıñ saibi ya da onıñ vekâletli temsilcisi tarafından aynı şu künü yazılğan ariza esasında Ukraina içki işler Nazirliginiñ territorial hızmet merkezleri tarafından berile”.

İşbu Qararname amelge keçirilgen kününden başlap, yani Qararnameniñ derc etilmesinden soñ 30 kün keçkeninen, Ukraina vatandaşları belgilengen şartlarğa riayet etip, naqliyat vastalarını qayd etüv vesiqasını yañıdan yaptırmaq maqsadınen vaqtınca işğal etilgen Qırım Muhtar Cumhuriyeti ve Aqyar şeeri topraqlarından bir kerelik çıqış yapa bilirler. Amma bundan evel olar naqliyat vastalarına ait qayd etüv kâğıtınıñ kopiyasını almaq kerekler.