Noyabr 15 künü 2017 senesi Ukraina Prezidentiniñ Qırım Muhtar Cumhuriyetindeki Daimiy Temsilcisi Borıs Babin Kiyev Milliy universitetiniñ Halqara münasebetler institutında keçirilgen “Ukraina Şarqında arbiy areketlerniñ ve Qırım işğaliniñ halqara-uquqiy neticeleri ve etraftaki muitke tesiri” serlevalı tögerek masada iştirak etti. Daimiy Temsilci ekspertlerge, merkeziy icra akimiyetniñ memurlarına ve prokuratura hadimlerine işğalniñ Qırım tabiyatına menfiy tesiriniñ halqara-uquqiy neticeleri aqqında malümat berdi. Tögerek masanıñ rezolütsiyasında Qırımğa yaqın yerlerde ya da Qara deñiz ve Azaq deñizi limanlarında, Kerç boğazında ve Sivaş körfezinde yerleşken ve ekologik ceetten havflı olğan obyektlerniñ vaziyetini teşkermege, semereli közetüv keçirilmesi içün ise BMT, AHIT, Ukraina ükümeti, halqara uquq-qorçalayıcı ve ekologik teşkilâtlarınıñ temsilcileri ile beraberlikte közetüv gruppasını teşkil etmege kerek olğanı qayd etildi.

Tögerek masa iştirakçileri ekologiya meselesini Qırımnıñ işgalden azat etilüvine ve reintegratsiyasına bağışlanğan  strategik ve leyha vesiqalarğa ve halqara uquqnıñ qaidelerine riayet etken Tamır halqlarnıñ aqları aqqında qanunğa kirsetmege tekilf ettiler. Rezolütsiya Ukraina ekologiya ve tabiat resursları nazirligine, uquq-qorçalayıcı organlarğa, merkeziy icra akimiyetniñ idarelerine, Herson vilâyeti devlet memuriyetine Qırımğa yaqın olğan rayonlarda tabiat qorçalayıcı uquqqa riayet etilmesini teminlemek ve qayd etilgen topraqlarda ekologik vaziyette deñişmelerni közetmege yardım etmege tefsiye ete.