16 aprel künü Temsilcilikte Crimea Global halqara konferensiyasınıñ üç yıllıq neticeleri taqdim etildi. Bundan ğayrı, tedbir vaqtında Ukrayinanıñ Asiya, Afrika ve Latin Amerika memleketleri ile dialogını quvetleştirmek maqsadınen bu sene keçirilecek Crimea Global konferentsiyasınıñ planları muzakere etildi. Körüşüvge Ukrayina Tış işler nazirliginiñ vekilleri ile milliy ve halqara ortaqlar arasında tedbirniñ potentsial donorları qoşuldı.
Daimiy Temsilci Olga Kurışko çıqışta bulunıp, Qırımnıñ devamlı işğali sebebinden peyda olğan meselelerge diqqat ayrılması ve Ukrayinağa global destekniñ celp etilmesi içün Crimea Global platforması pek müim olğanını qayd etti.
“Temsilcilik/Qırım platformasınıñ ofisi, Ukrayina topraq bütünligine diqqat ve qoltutuv eksikligine cevap olaraq, Asiya, Afrika ve Latin Amerika memleketleri tarafından 2023 senesi birinci Crimea Global konferentsiyasını teşkil etti. Al-azırda bu Ukrayinada yekâne büyük konferentsiya olıp, Afrika, Asiya ve Latin Amerika memleketleriniñ cemaat ve ekspert sektorlarınıñ vekilleri içün global çağıruvlarnı muzakere etmek içün unikal munaqaşa platformasını temin ete”, – dep qayd etti o.
Qırım platformasınıñ faaliyetini temin etüv hızmetiniñ yolbaşçısı Nelâ Grinışin aytqanına köre, Crimea Global Qırımnıñ işğalden azat etilmesi mevzusını global arenada ileriletmek içün, em de Ukrayinada Rusiye cenkinen bağlı diger müim meselelerni muzakere etmek içün müimdir: aşayt havfsızlığı, adalet, müstemlekecilikke qarşı küreş, silâlı zıddiyetler şaraitinde qadınlarnıñ tirenüvi.
Crimea Global tesisçisi, aq qorçalayıcı Mariya Tomak, Crimea Global tedbiriniñ üç yıllıq neticeleri ve esas neticeleri aqqında öz tedqiqatını taqdim etti.
“Konferentsiya devamında em Ukrayina, em de diger memleketler içün müim olğan mevzularnı muzakere etmege tırışamız: qadın aqları ya da silâlı zıddiyetler vaqtında qadınlarğa qarşı zorbalıq kibi umumiy mevzulardan başlap, daa konkret mevzularğa, misal içün, Rusiyeniñ Global Cenübiy memleketlerinden kelgen cenkçilerni nasıl celp etkenine qadar”, – dep qayd etti o.
İnsan aqları içün Media teşebbüsiniñ icra müdiri Stanislav Miroshniçenko er bir konferentsiyanıñ raqamlarını numayış etti ve Crimea Global qonuşmacılarınıñ bazı yayınları aqqında aytıp berdi. Umumen, üç yıl içinde Ukrayinağa Crimea Global çerçivesinde konferentsiyağa onlayn rejiminde qoşulğan ya da Ukrayina Tış işler nazirligi tarafından teşkil etilgen tedbirler çerçivesinde Ukrayinağa kelgen ecnebiy spikerlerni esapqa almayıp Asiya, Afrika ve Latin Amerikası memleketlerinden 48 qonuşmacı keldi.
ZMINA İnsan Aqları Merkezi idaresiniñ yolbaşçısı Tetana Peçonçik, 2026 senesine Crimea Global kontseptsiyasını taqdim etti. Onıñ aytqanına köre, geosiyasiy müitte, halqara uquqtan ziyade küç üstün olğan yerde, insan aqları ve olarnıñ qoruvı aqqında söz yürsetmek müimdir.
Crimea Global – 2023 senesi başlatılğan halqara konferentsiya. O vaqıttan berli tedbir er yıl Ukrayina Prezidentiniñ Qırım Muhtar Cumhuriyetindeki Temsilciligi/Qırım platforması ofisi, ZMINA İnsan aqları Merkezi ve İnsan aqları içün Media teşebbüsi tarafından teşkil etilmekte.
Crimea Global halqara ekspertlerni, jurnalistlerni, cemaat fikriniñ liderlerini Ukrayina kontekstinen daa teren tanış etmege imkân bere, cenk zamanınıñ kerçeklerine ve Qırımnıñ uzun müddetli işğali meydanğa ketirgen meselelerge diqqat ayıra, em de olarnı eki taraf içün de müim olğan mevzularnı muzakere etüvge celp ete.
