Yanvarniñ 30-nda ağır hastalıqtan soñ onkolog ve qırımtatar milliy areketiniñ faal iştirakçisi Süleyman Cemilev vefat etti. Bu aqta Milliy Meclis reisi Refat Çubarov bildirdi.

Süleyman Cemilev 1957 senesi Uralğa sürgün etilgen bir qırımtatar qorantasında doğdı. Tek 1992 senesi qorantasınen Qırımğa qaytıp kele. Uzun vaqıt devamında Qırım onkologiya dispanserinde yetekçi ekim olaraq çalıştı, nam qazanğan ekim unvanını qazandı. 2015 senesinden başlap Kıyivdeki Milliy rak hastalıqları institutında onkolog olıp çalışa edi. Rametliniñ Zekiye adlı qızı ve Mudafaa Quvetleri saflarında Ukrayinanı qorçalağan Rustem oğlu bar.

Qırım Muhtar Cumhuriyetiniñ Daimiy Temsilciligi bu ağır ğayıptan dolayı Süleyman Cemilevniñ qorantasına teren taziyelerini bildire.

Süleyman Cemilev bizim içün ep zenaatına, menligine ve printsiplerine sadıq qaluvnıñ bir timsali olıp qalacaq.

Allah rahmet eylesin