Украина территориясында къануний эсасында булунгъан ве даимий яшавгъа акъкъы олгъан четель адамы я да гражданлыгъы олмагъан шахыс, Украинада яшагъан ерини меджбурий алда ташлагъан, Къырым Мухтар Джумхуриети ве Акъяр шеэри вакътынджа ишгъаль олунма-сы себеп яшав ерлерини меджбурий алда ташлагъан Украина ватандашлары ички юрьме шахыслары оларакъ сайылмакъталар.
Ички юрьме делили ички юрьме шахыслар (ИЮШ) джедвелине кирсетильмесини исбатлагъан, “Ички юрьме шахысларнынъ укъукъ ве азатлыкъларнынъ темин этильмеси” Украина къанун къайделеринен козь огюне алынгъан аллардан гъайры, муддетсиз амельде булунгъан малюмат кягъытынен тасдыкъланмакъта.
Малюмат кягъытыны алмакъ ичюн, ИЮШ Украинанынъ къыта тарафындаки эали ичтимаий къорув суаллери боюнджа структурасынынъ болюгине джедвельге къоюв аризасы иле шахсий алда , чагъына етмеген бала, чалышып оламагъан я да толусынен мешгъуль оламагъан шахыслар исе къануний векили вастасы иле мураджаат этмелилер.
Чагъына етмеген бала къануний векиллеринен рефакъат этильмеген алында, онынъ адындан сойлары (къартанасы,къартбабасы,дедеси, чагъына еткен агъа я да татасы, тизеси ,эмджеси), я да баланен яшагъан (булунгъан) бабалыгъы, огей анасы ариза бермелилер. Сойлар – нынъ олмагъаны алында, аризаны бала булунгъан еринден васийлик идаресининъ векили бермели.
Балалар муэссисесинде, балалар сагълыгъыны къорув я да толусынен девлет теминлевинде булунгъан ичтимаий къорув муэссисе – леринде ерлештирильген бала адындан аризаны мутенасип муэссисесининъ ребери бермели.
Аризагъа къошма оларакъ, мытлакъ, шахсиетни исбатлагъан ве Украин гражданлыгъыны тасдыкълагъан, я да шахсиетни исбатлап, махсус статусны тасдыкълагъан весикъалар, я да догъма шеадетнамеси теслим этильмели.
Ариза къануний векили я шахыснынъ сойлары, я да мутенасип муэссисе векили тарафындан берильген алда, къошма оларакъ ашагъы – даки весикъалар теслим этильмели.
Къанунгъа эсасланаракъ, эгер шахыснынъ весикъасында яшав ери болюгинде онынъ Къырым Мухтар Джумхуриети территориясында я да Акъяр шеэринде къайд этильгени акъкъында бельгилери олмаса, мураджаат этювджи Къырым вакътынджа ишгъаль олунгъаны заман анда яшагъанынынъ исбатларыны кетирмели.
Бойле исбатлар оларакъ сайылмакъта:
- арбий хызметте булунгъаны акъкъында малюматларнынъ къайд олунмасы алындаки арбий билеты;
- эмек фаалиети акъкъында къайд олунгъан малюматлары иле хызмет дефтери;
- арекет ве арекетсиз мулькиетининъ саиби олгъаныны тасдикълагъан весикъасы;
- эсас умум орта тасиль шеадетнамеси;
- толу умум орта тасиль аттестаты;
- зенаат- техникий тасили акъкъында весикъасы;
- алий тасиль( ильмий унваны) акъкъындаки весикъасы;
- окъугъан еринден малюмат кягъыты;
- тыббий весикъалары, фотосурутлер, видеоязылмалар ве иляхре.
Бойле алда, халкъ ичтимаий къорув тешкиляты аризаны 15 иш куню девамында бакъмасы меджбур ве ариза берювджиге малюмат кягъытынынъ бериледжеги я да себеплери къайд олунмасы алында ред олунгъаны акъкъында къарар чыкъармалы.
Ариза иле ИЮШ джедвелине кирсетилюв мураджаатынен булунгъан ве ИЮШ малюмат кягъытыны алмагъан, оларнынъ укъукълары бозулгъан деп сайгъан Украин ватандашлары, процессуаль шекилинде весикъаларнынъ тертип этильмесинде экинджи сефер бедава укъукъ ярдымынен къулланмагъа я да малюмат кягъытынынъ алынув суалинде шахыснынъ менфаатыны такъдим этювинде векиллик хызметинен файдаланмагъа акълылар.
Тафсилятлыджа малюматны ватандашлар Украина ичтимаий сиясет назирлигине мураджаат этип, ала билелер.
Ярдым ве тевсие иле ватандашлар Къырым Мухтар Джумхуриетинде Украина Президентининъ Векялетханесине даима мураджаат эте билелер.