2018 senesi berim (sentâbr) ayı 17 künü Temsilcilikteki halqara alâqalar hızmetiniñ yolbaşçısı Yevgen Samuha Avropa-Atlantik işbirligi İnstitutınıñ ve Konrad Adenauer Fondu Temsilciliginiñqol tutuvı ile Kıyiv şeerinde teşkil etilgen Yedinci Avropa-Atlantik forumında iştirak etti.

Tedbirde Ukraina Baş Naziriniñ Avropağa integratsıya boyunca muavini İvanna Klımpuş-Tsıntsadze, Ukraina çetel işler Naziri Pavlo Klimkin, Ukraina Yuqarı Şurasınıñ çetel işler boyunca Komitetiniñ başlığı Ganna Gopko, Ukrainada Kanada Elçisi Roman Vaşçuk, başğa yerli ve çetelden diplomatlar, siyasiy ve arbiy ekspertler, devletimizdeki cemaat teşkilâtlarınıñ vekilleri iştirak etti.

Forumda transatlantik istiqrarsızlıq şaraitlerinde Avropa devletleriniñ cemiyetleri ve ükümetleri arasındaki birdemlikniñ ve AB ile NATO azaları olğan devletlerniñ Ukraina ile işbirlikleriniñ muimligi, devletimizniñ Avropa-Atlantik ceryanlarda yeri, Ukrainada islâatlar çerçivesinde garpqa integratsiya, RF ile gibrid cenk şaraitlerindeki havflarğa İttifaqnıñ siyasiy ve arbiy cevapları muzakere etildi. RF-nıñ Ukrainağa qarşı tecavüzine ve AB-de ve AQŞ-da vaziyetke tesir etmek ıntıluvlarına tek halqara cemiyetniñ ğayretlerini birleştirip semereli şekilde qarşılıq köstermek mümkün olğanı qayd etildi. Bir coq maruzalarda ve subetlerde Qırım meselesi köterilip, onı çezüv yolları muzakere etildi.