Mayısnıñ 11-nde Büyük Britaniya ve Avropa Birligi, mecburiy sürgünlik, ukrayin balalarınıñ indoktrinatsiyası ve arbiyleştirilüvi, em de rusiyeniñ malümat sahtelev kampaniyasına alâqası olğan hususiy ve uquqiy şahıslarğa qarşı sanktsiyalar kirsetti.
Sanktsiyalar cedveline kirsetilgen qurulışlar arasında – ukrayin balalarını rusiye propagandasına, arbiy azırlıqqa oğratqan ve rusiye narrativlerini dağıtqan rus bala merkezleri bar. Cedvelge rusiyeniñ tasil nazirliginen bağlı federal devlet müessiseleri kirsetildi, şu cümleden, “Orlenok”, “Alıye Parusa” ve “Smena” bütünrusiye bala merkezleri.
Temsilcilik, öz nevbetinde, vaqtınca işğal etilgen topraqlarda bala ve gençlerniñ indoktrinatsiyası ve askeriyleştirilüvi saasında işğalci siyasetiniñ amelge keçirilmesine celp etilgen şahıslar aqqında tekliflerni azırlap, vekâletli organlarğa bildirdi. Hususan, sanktsiya cedvellerinden Temsilcilik böyle şahıslarğa nisbeten teklifler berdi:
- Vladislav Golovin – Ukrayinanıñ vaqtınca işğal etilgen topraqlarında yaşlarnı arbiyleştirüv siyasetini şekillendirüv ve amelge keçirüv iştirakçisi;
- Marina Slonçenko – Aqyar şeeriniñ gençlik işleri işğalci idaresiniñ yolbaşçısı, gençler arasında rus teşviqatınıñ tarqaluvına alâqası bar;
- Natalya Şevçuk – ”askeriy-vatanperverlik” terbiyesi ve gençlerni rusiye federatsiyasınıñ silâlı quvetlerinde hızmet etüv içün azırlağan DOSAAF Aqyar regional bölüginiñ müdiri;
- Oleksiy Zınçenko – balalar ve gençlerniñ askeriyleştirilmesine doğrultılğan tedbirlerniñ, şu cümleden ”Artek” halqara bala merkeziniñ faaliyetinde teşkil etilmesinde iştirak etken şahıs;
- Aqyar şeerinde DOSAAF regional bölügi – vaqtınca işğal etilgen Qırım topraqlarında tasil esnasınıñ askeriyleştirilmesine celp etilgen bir qurulış.
Bu şahıslar ve teşkilâtlarğa qarşı sanktsiyalarnıñ kirsetilmesi, vaqtınca işğal etilgen Qırım territoriyasında ukrayin balalarınıñ arbiyleştirilüvinde, tecavuzcı devletniñ siyasetiniñ tarqatıluvında ve amelge keçirilüvinde iştirak etkenlerni mesüliyetke çekmek içün müim bir adımdır.