2018 senesi berim (sentâbr) ayı 18 künü Ukraina Prezidentiniñ Qırım MC Daimiy Temsilcisi Borıs Babin ve oniñ Birinci muavini İzet Gdanov ‘‘Çonğar’’ ve ‘‘Qalançaq’’ kiriş-çıqış nezaret noqtalarına (KÇNN) yaqın olğan stantsıyalarğa ve işbu stantsıyalardan demiryol naqliyatını mükemmeleştirüv ve KÇNN ile Ukrainanıñ vaqtınca işğal etilgen Qırım toprağı arasında qanunsız naqliyatnı toqtatuv boyunca idareler arası muşavere keçirdiler.

Muşaverede ‘Ukraina Havfsızlıq Hızmeti Baş idaresiniñ, Ukraina infrastruktura Nazirliginiñ, naqliyatta havfsızlıq boyunca Ukraina Devlet Hızmetiniñ, ‘‘Ukrzaliznıtsâ’’ halq öğündeki aktsioner cemiyetiniñ, ‘‘Ukrinteravtoservis’’ devlet şirketiniñ, Ukraina Devlet maliye hızmetiniñ, Ukraina Havfsızlıq ve Mudafaa Şurasınıñ ve başqa müessiselerniñ vekilleri iştirak etti.

Muşavere esnasında aşağıdaki meseleler muzakere etildi:

– merkeziy akimiyet organlarnıñ ameldeki qanuniyetke deñişmeler kirsetüv ve ‘‘Çonğar’’, ‘‘Çaplınka’’, ‘‘Qalançaq’’ KÇNN-na ve işbu KÇNN-dan demiryol ve avto vastalarnen naqliyatnı temin etüv ve mükemmeleştirüv boyunca umumiy qararlarını amelge keçirüv;

– regionda avto vastasınen naqliyatnı kerçekleştirgen qanunsız yolcu taşıyıcılarnı belgilev ve olarnıñ faaliyetlerini toqtatuv saasında ‘‘Ukrtransbespeka’’ şirketiniñ Herson vilâyetinde areketsizligi;

– KÇNN-na ve KÇNN-dan avto vastasınen yolcu taşıycılarnı  qanuniy şekilde belgilevde ihtiyaç;

– uzaq mesafeli tren seferlerini Vadım stantsıyasına qadar uzatuv.

Bundan da ğayrı, qıta Ukraina ile Rusiye Federatsıyası arasında avtobus ve demiryol vastasınen naqliyatnı toqtatuv meselesi muzakere etildi.

Keçirilgen muşavereniñ neticesi olaraq mütenasip qararlar alındı ve bir sıra tedbirler planlaştırıldı.