2017 senesi noyabr 22 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Borıs Babin, onıñ Birinci muavini İzet Gdanov ve Temsilcilikniñ mesuliyetli memurları vactınca işğal olunğan topraqlarda yaşağan faalci vatandaşlarnı nevbetten tış  qabul ettiler.

Qabul etilgen vatandaşlar memuriy hızmet saasında, bu cümleden, pasportlaşma meselesinde Herson vilâyeti icra akimiyetniñ areketlerine ya da areketsizligine, QÇNN-ni donatuv vaziyetine, QÇNN-de bulunuv şartlarına ve uquq qorçalayıcılar, bu cümleden, Milliy politsiya hadimleri buña ekseriy allarda qulaq asmağanlarına çoqtan çoq şikâyet ettiler. Qırımda yaşağanlardan çağına yetmegen balalar ve imkânları sağlıq ceetten sıñırlı olğan adamlarnıñ şahıslarını tasdıqlağan vesiqalar aluvınen bağlı ameliy qıyınlıqlar muzakere etildi.

Cemaat vekillerine Temsilciniñ avalesinen teşkil etilgen iş gruppasınıñ vaqtınca işğal olunğan Ukraina topraqlarınıñ aktual meselelerini çezüvine bağışlanğan dekabr ayında nevbetteki toplaşuvında iştirak etmege teklif etildi. Temsilcilikniñ reberiyeti cemaatqa memuriy hızmet merkezleri teşkil olunuvınen ve KÇNN ve etraflarınıñ donatıluvınen bağlı olup acele sürette yapılğan tedbirler aqqında malümat berdi.

Cemaat vekilleri Temsilcilik tarafından teklif etilgen KÇNN donatuluvı, qanunğa riayet etken taşımalarnıñ teşkil olunuvına ve Herson vilâyetiniñ Qırım MC-ne yaqın olğan mesken yerlerinde öz-özüni idare etüv organlarnıñ esasında memuriy hızmet merkezleri teşkil olunuvına qoltuttılar. Bundan da ğayrı, Qırım sakinlerine memuriy hızmet berüv ve taşıma saalarında cinayet ve qaparcılıqqa qarşılıq kösterilüvi aqqında cemaatqa mümkün olğanı qadar malümat berildi. Aq-uquqları bozulğan ya da sıñırlanğan bütün şahıslar öz şikâyet ve tekliflernen deral Temsililikke müracaat etmeğe çağırıldı.

Cemaat vekilleri Ukraina Milliy Politsiyasınıñ Qırım MC ve Aqyar boyunca Baş idaresiniñ Herson vilâyetine köçüvine ve merkeziy akimiyetniñ mütenasip qararlarına da tolusınen  qoltuttılar.