CrimeaIsUAbot subet botu faaliyetini keñleştire, endiden başlap, Viber qullanıcıları da onlayn şekilde berilgen acele tevsiyelernen faydalana bilir. Subet botu vaqtınca işğal etilgen Qırım yarımadasında yaşağan Ukraina vatandaşlar içün yaratılğandır, onıñ yardımınen Ukraina vatandaşı pasportını resmiyleştirüv, işğal etilgen topraqlarda doğuv ve ölüm adiselerini tasdıqlav, KÇNN-nı keçüv kibi eñ çoq soralğan suallerge umumiy cevap almaq mümkündir.
Subet botu Viber ağında https://is.gd/9XAoCL bağlantısı boyunca yerleştirilgendir
Ukraina Prezidentiniñ Qırım Muhtar Cumhuriyetindeki Temsilciligi içün vaqtınca işğal etilgen yarımadada yaşağan vatandaşlarnen bağ tutuv oğrunda çalışmaq pek müimdir.
”Devlet tarafından memuriy ve başqa hızmetlerni Qırım sakinlerine maksimal derecede yaqınlaştırğan aletler yaratılmalıdır. Söz yalıñız memuriy hızmet merkezleriniñ memuriy sıñırnıñ özünde ziyaret etile bilecegi aqqında yürsetilmey, onlayn şekilde hızmetlerni bermek imkâniyeti üstünde çalışamız. CrimeaIsUAbot subet botu ile al-azırda Qırım yarımadası topraqlarında yaşağan biñlerce vatandaşlar qullandı. Viber qullanıcıları da subet botunı aves etti, endi onı taqdim ete bilecegimizden memnünmiz. Subet botu vastasınen Ukraina vatandaşı pasportını resmiyleştirüv, işğal etilgen topraqlarda doğuv ve ölüm adiselerini tasdıqlav, KÇNN-nı keçüv boyunca aktual malümatlarnı deral almaq mümkündir. Bunınen beraber, toldurılacaq vesiqalarnıñ nümüneleri mevcüt ve evelden nevbetke yazılmağa da imkânı bar. Başqa yönelişlerde de çalışmağa devam etemiz, ortaqlarımıznen beraber ögümizde turğan yañı vazife – Qırımda yaşağan vatandaşlarımızğa notarial hızmetlerniñ berilmesi” – dep ikâye etti taqdim etüv esnasında Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini Darya Svırıdova.
Hatırlatamız ki, Ukraina Prezidentiniñ Qırım MC Temsilciligi Qırım_SOS aq qorçalayıcı teşkilâtı ve insan aqları boyunca Ukraina-Helsinki birligi ile beraber Telegram içtimaiy ağında çalışqan CrimeaIsUAbot (t.me/CrimeaIsUaBot) subet botunı taqdim etti.
Telegram ağında subet botunı CrimeaIsUAbot adı vastasınen, ya da bilgisayardan https://t.me/CrimeaIsUaBot bağlantısı boyunca tapmaq mümkündir.