2018 senesi yanvar 24 künü Ukraina Prezidentiniñ Qırım MC Temsilciliginde Daimiy Temsilci vazifesini becergen İzet Gdanov başlığında memuriy hızmet Merkezleriniñ memurları içün yañı iş yerleriniñ donatıluvı ve faaliyetleriniñ teşkil etilüvinen bağlı aktual meseleleriniñ çezilüvi boyunca keñeş olıp keçti. Keñeşte Ukraina Devet migratsiya hızmetiniñ Herson vilayetindeki İdaresiniñ başlıq muavini İvanov D.V., Temsilcilikniñ hadimleri, Herson ve Kahovka şeerlerindeki öz-özüni idare etüv organlarınıñ, Çaplınka rayon devlet memuriyetiniñ, Askaniya-Nova birleştirilgen territorial cemiyetniñ vekilleri de iştirak etti.

Keñeş devamında İvanov D.V. memuriy hızmet Merkezleriniñ adım-adım teşkil etilüvi (bu cümleden, Merkezlerniñ memurları içün yañı iş yerleriniñ açıluvı, Milliy gizli alâqa tertibatınen bağlanması, iş yerlerine tehnikiy şaraitleriniñ azırlanması) boyunca Ukraina Devlet Migratsiya Hızmeti işlep çıqarğan talimatnı taqdim etti. Devlet Migratsiya Hızmeti Temsilcilik ile beraberlikte çezecek kergin meseleler seslendirildi. Bundan ğayrı, mezkür Merkezleriniñ eñ yaqın kelecekte açılması maqsadınen mütenasip avaleler ve tevsiyeler berildi.

Merkezlerniñ açıluv tarihleri:

Kahovka şeeri, Kahovka şeer şurası – ağımdaki seneniñ fevral ayında,

Çaplınka qasabası, Çaplınka rayon devlet memuriyeti – mart ayında,

Herson şeeri, Herson şeer şurası – aprel ayında.

İzet Gdanov, öz nevbette, pasport vesiqalarınıñ resmiyleştirüvinen bağlı bütün hızmetlerni bergen ve böyleliknen vaqtınca işğal olunğan torpaqlarda yaşağan Ukraina vatandaşları içün bu ceryannı qolaylaştırğan memuriy hızmet Merkezlerinden ya da olarnıñ ayrı bölüklerinden Herson vilâyetinde umumiy ağnıñ teşkil etilüvi Temsilcilikniñ birinci nevbetteki vazifelerden biri olğanını qayd etti. Territorial cemiyetlerniñ bücet kelirleri artacaq, çünki memuriy hızmetniñ ücreti ve devlet alımı yerli bücetlerniñ umumiy fonduna tölene, bu ise yerli cemiyetniñ infrastrukturasınıñ inkisafına ve yañı iş yerleriniñ peyda olmasına hızmet ete.