2017 senesi dekabr 11 künü Ukraina Prezidentiniñ Qırım MC Temsilciliginde Herson vilâyetindeki Devlet migratsiya hızmetiniñ (DMH) idaresi, Devlet havfsızlıq hızmetiniñ Qırım MC ve Aqyar boyunca baş idaresi, Devlet sıñır hızmetinde (DSH) Azaq-Qaradeñiz idaresiniñ iştiragi ile vaqtınca işğal olunğan Qırım MC topraqlarıda yaşağan Ukraina vatandaşları içün memuriy hızmetler ve Qırım MC ile memuriy sıñırnıñ keçüvi boyunca keñeş keçti.
Keñeşniñ devamında mezkür administrativ hızmetlerniñ, Qırım sakinlerini qapar ve suistimal telükelerine oğratmayıp, tez ve havfsız şekilde berilüvi muzakere etildi. Pasportnen bağlı meselelerni qolaylaştırmaq içün elektron nevbette qayd etilmege teklif etildi. Devlet miğratsiya hızmetiniñ vekilleri, vaqtınca işğal olunğan topraqlarda yaşağan vatandaşlar içün başlatılğan mütenasip leyha çerçivesinde, elektron nevbette qayd etüv esnasını bitirmek içün ekran skrinşotını derc etmeğe yeterli olğanını bir kere daa tekrarladılar.
DMH reberiyeti tarafından Temsilcilikniñ memleket içinde köçken şahıslarğa ve vaqtınca işğal olunğan topraqlarda yaşağan vatandaşlarğa administrativ hızmetlerni berüvnen bağlı yañı teşebbüslerge celp etilmesi faydalı olğanı qayd etildi. DMH vekili, yañı pasportnı İD-kart şekilinde alğan Qırım sakinlerine işbu İD-kartnı bergen DMH bölügine ariza yazıp, İD-kart yerine tutıp alınğan eski Ukraina vatandaşı pasportnıñ nomerası, sanı ve bergen organı kibi malümatlar yazılıp müür ile belgilengen malümat kâğıdını almağa tefsiye etti.
Ukraina DMH ve DSH vekilleri Qırımda yaşağan vatandaşlarnı, pasportlarına yaşına köre yañı resim yapıştırılğandan ve ID-kartını alğandan soñ, arizaları esasında vaqtınca işğal etilgen topraqlarğa elinde pasportları olmadan qaytabileceginde kesen-kes işandırdılar. Böyle seferni yalıñız Ukraina DMH bölüginde alınğan ariza-anketa esasında yapmağa mümkün olacaq. İşbu ariza-anketanı vaqtınca işğal olunğan Qırım ile memuriy sıñırda qabul etken Ukraina DSH hadimi er bir vatandaş boyunca 40 daqqa içinde ayrıca qarar çıqarmalı.
Ukraina DMH ve DSH vekilleri qayd etkenlerine köre, çağına yetmegen balarnı insan ticaretinden qorçalamaq maqsadınen, olar memuriy sıñırdan em ana, em de babalarınen beraberlikte, ya da olardan birisi mevcüt olmağan alda onıñ adından berilgen notarial vekâleti ile keçebileler. Notarial vekâletiniñ metinde Ukrainanıñ vaqtınca işğal etilgen Qırım toprağına seyaat yapılacağı aqqında söz yürsetilmesi şart olğanına ayrıca diqqat çekildi.
Keñeş iştirakçileri vaqtınca işğal olunğan topraqlarda yaşağan vatandaşlarğa Qırımda açıq-aydın sürette öz hızmetlerini beyan etip pasport vesiqalarını qolay şekilde almağa teklif etken ticariy ya da sözde cemaat teşkilâtlarınen işbirlikten vazgeçmege tefsiye ettiler. Aracılarnıñ faaliyeti, itimal, işğalci akimiyetniñ cezalav organları ve mahsus hızmetleriniñ nezareti altında yürsetilmekte, bu ise olarnıñ hızmetlerinen faydalanğan vatandaşlarnı telükege qoya.