2018 senesi ilk yaz ayı (iyün) 22 künü siyasiy mabus Volodımır Baluh Ukraina Prezidentine açıq mektüp yazıp, Tañrı tarafından bizge berilgen Qırım ve Donbas topraqlarında yaşamaq ve olarnıñ itibarlı saibi olmaq aqqımız, kreml aydutları bunu ne qadar istemese de, tez vaqıtta ğayrıdan tikleneceginden ve reine olaraq tutulğan Ukraina devletiniñ vatandaşları da bu ceryanğa muim isselerini qoşacağından eminlikni bildirdi.

Ukraina Prezidenti Petro Poroşenko bu munasebet ile qayd etkeni kibi, kremlniñ apishanelerinde bile, yasaq etüvge ve sert cezalavlarğa baqmadan, ukrain gimnini yırlağan halqnı iç kimse yeñmez. Petro Poroşenko boysunmağan Volodımır Baluhqa mektübi ve daa ziyade cesürligi içün minnetdarlığını bildirip, RFda, vaqtınca işğal etilgen Qırımda ve Donbasta bulunğan bütün ukrainalı reineler içün küreşni toqtatmayıp devam etmege vade etti. Ukraina Prezidenti eñ yaqın vaqıtta Ukraina vatanperveriniñ qolunı serbest ukrain toprağında sıqmaq içün elinden kelgenini yapacağını qayd etti.

Volodımır Baluhnıñ Ukraina Prezidentine mektübini deñiştirilmegen alda taqdim etemiz:

Ürmetli Ukraina Prezidenti!

Men – çastlı adamlardan biri olam, çünki meni moskova esirliginden bütün Ukraina azat etmege tırışa.

Yer kürresiniñ 1/7 qısımınıñ ükümdarları teror areketlerini toqtamay yapmaqta, bu siyasiy ‘‘anane’’ Kreml üstündeki bayraqnıñ renkine baqmadan, ep devam etmekte.

Eyilik içün yamanlıq yapılmaz!

Öz devletçiligini ğayrıdan tiklegen Ukraina, men bellesem, kelecekke kozak adetleriniñ, hristian insaniyetliginiñ ve ananeviy köylü emekseverliginiñ eñ güzel nümünelerini almalı.

Bunı açıq aytmaq isteyim – 2014 senesi qural ayında Kıyivde Siznen bir saylav bölügine barğanıma baqmadan, öz reyimni Siz içün bermegen edim. Ama ürmet ile şunı qayd etmek isteyim ki, aqılsız ‘‘ağanıñ’’ pancalarına tüşken Ukraina vatandaşlarınıñ taqdirleri içün küreşiñiz maqtavğa lâyıqtır!

Öz vaqıtında rusiye şairlerinden biri işbu satırlarnı yazğan edi: ‘‘… Emegimiz nasıl neticelerge ketirecegini bilmemiz imkânsızdır…’’.

Eminim ki, Tañrı tarafından bizge berilgen Qırım ve Donbas topraqlarında yaşamaq ve olarnıñ itibarlı saibi olmaq aqqımız, kreml aydutları bunu ne qadar istemese de, tez vaqıtta ğayrıdan tiklenir ve reine olaraq tutulğan Ukraina devletiniñ vatandaşları da bu ceryanğa muim isselerini qoşar.

Keçenlerde kreml tarafından ‘‘rusiye künü’’ olaraq adlandırılğan ilk yaz 12 kününde Aqmescitte çin salütları patladı, SIZO-nıñ pencerelerinden ise ‘‘Ukrainağa şan-şüretler olsun’’ sözleri kütleviy şekilde yanğıradı, bir qaç mabus Ukraina gimnini icra etti… Bu vaqianıñ tesadüfen şaatından, yani menim ağızımdan çıqqan samimiy kerçektir. Ve aynı vaqıtta men ‘‘tantananıñ sebepçisi’’ aqqında iç bir yahşı söz eşitmedim.

Keçken asırnıñ birinci yarısında bir sıra devletniñ qararsızlığı, digerlerniñ çetleşüvi ve üçünci tarafnıñ cinaiy nefishorluğı bütün dünyanı büyük felâketke ketirdi, insanlıq ise bundan hulâsa çıqarmadı.

Ukraina o zaman kene de duşmannıñ pancasına tüşti…

Ümüt etem ki, tarihniñ accı dersleri medeniy dünyanı ahır-soñu birleştirir ve devletlerniñ yolbaşçıları, çette turmaqnı red etip, vaqtınca maaliy ğayıplardan ve bazı qolaysızlıqlardan qorqmayıp, birlikte qararlı areketlerge keçerler.

Dünyanıñ başqa memleketlerniñ vatandaşlarını ve ükümetlerini maqsat etken kreml propagandasına qarşılıq kösterüv boyunca Devletimizniñ faaliyetine bulunğan yerimden tolu derecede qıymet kesmege qıyın, amma bu meselede Ukraina artta qalmağanı, viran etilgen yaşayış ve siyasiy mabuslarnıñ biçare horantaları nafile olmağanına ve çette qalmaycaqlarına ümüt bere.

Biz ile Aqiqat!

Biz ile Qısmet!

Ve aziz İrade!..

Ukrainağa şan-şüretler olsun!

Ürmet ile, Baluh V.İ. 22.06.2018