Hayince ve cenk ilân etmeden, bütün halqara qanunlarnı ve añlaşmalarnı, medeniy milletlerniñ özara munasebetlerniñ esas qaidelerini bozıp, Yevromaydannıñ facialı adiselernen ve Ukrainanıñ topraqlarında bulunğan öz arbiy bazalarnen faydalanıp, istilâci devlet 2014 senesi fevral ayında Qırım yarımadasını öz arbiy nezareti altına aldı.

2014 senesi yüz bergen Ukrainağa qarşı istilâ rus imperializmniñ mefküre saipleri ve ameliyatçıları tarafından yapılğan birinci haqara cinayeti degil edi. Amma Ekinci cian cenkindeñ soñ birinci kere Avropa devletiniñ toprağı ilhaq etildi.

Rus askeriyeniñ Qırımdaki ‘‘muvafaqiyetlerinden baş aylânması’’ facialı neticelerge ketirdi. Rusiyeli aydut-işğalci ordusınıñ Donbasta qanlı suçluğı ve Suriyede askeriy interventsiyası devamında insaniyetke qarşı çoqtan-çoq cinayetleri Qırım işğaliniñ doğrudan-doğru aqibeti olıp, Rusiyeniñ bütün medeniy dünyağa qarşı ilân etilmegen cenkiniñ cebelerini kenişletti.

Qırım toprağında işğalniñ birinci künlerinden istilâcı öldürmege, qıynamağa, Ukraina devletiniñ, ayrı şahıslarnıñ ve ukrain halqınıñ milliy zenginligini hırsızlamağa, işğal olunğan topraqnıñ ealisini öz ordusına çağırmağa, qırımtatar ve ukrain medeniyetlerini yoq etmege, qırımtatar halqınıñ öz-özüni idare etüv organını, bağımsız matbuat vastalarnı, faalcilerni ve uquq qorçalayıcılarnı taqip etmege başladı.

Bu halqara cinayetlerde, Qırımda insan aq-uquqlarınıñ ve demokratiyanıñ yoq etilüvinde  işğalci akimiyetniñ eñ faal yardımcıları ilk nevbette qaparcılar ve cinaiy keçmişleri olğan, Menlik İnqlâbı ile yoq etilgen tertibatqa qol tutqan Ukraina vatandaşları oldı.

Rusiye istilâsınıñ birinci künlerinden başlap, ukrain devleti öz inkişafınıñ ilk nevbetteki maqsadı olaraq Qırımnıñ işgalden azat etilüvini belgiledi. Ukraina devlet akimiyetiniñ Qırım meseleleri boyunca mahsus idariy ve uquq qoruyıcı organları meydanğa ketirildi, Ukraina Prezidentiniñ Qırım MC Temsilciligine yañı vazifeler berildi. Al-azırda işğalden azat etüv boyunca ilk nevbetteki adımlarnıñ planı azırlana, eñ yaqın vaqıtta bütün devlet organlarnıñ ğayretlerini birleştirgen iş gruppası meydanğa ketirilecek.

Halqara uquq qaidelerine riayet etmege talap etken Ukrainağa qol tutqan, devam etken memleketara silâlı dava şaraitlerinde devletimizge ertaraflarma yardım köstergen bütün devletlerniñ müim rolüni ayrıca qayd etmelimiz. Birleşken Milletler Teşkilâtı, Avropa Şurası, Avropada Havfsızlıq ve İşbirlik Teşkilâtı ve Avropa Birligi Rusiyeniñ Qırımda cinaiy areketlerini qattı sürette takbih ettiler.

Ukrain ordusına, gönüllilerge, Rusiyeniñ istilâsını toqtatmaq içün sağlıq ve canlarını feda etken bütün qaramanlarğa ayrıca minnetdarmız.

Qırımnı ve Donbasnı işğalden azat etüv ceryanları devlet idaresi tertibatını semerelik ceetinden teşkerip, cemiyetniñ siyasiy pişkinliginiñ köstergiçi oldı. İşğalcige aqiqiy qarşılıq kösterüv esnası popülizmden ve parlaq şiarlardan pek uzaqtır. İşğalciniñ esas ittifaqdaşları – qaparçılıq ve ayrı memurlarnıñ beceriksizligidir.

Eminmiz ki, rus imperializmni tek bütün akimiyet organlarımıznıñ ve ukrain cemiyetiniñ yapıcı küçleriniñ birleşüvinen yenmeğe mümkün olacaq.