Bugün, 2025 senesi yanvarniñ 17-nde, Temsilcilikniñ teşebbüsinen, Qırım mevzusını aktualleştirmek ve yaşlarnı kögnitiv deokupatsiya ceryanına celp etmek maqsadınen “Qırım ve yaşlar: metanet usulları, birlik degerlikleri” adlı pilot munaqaşa keçirildi. 

Tedbirniñ başında Temsilcilikniñ informatsion desteklev bölüginiñ başı Yevğen Bondarenko Temsilcilikniñ gençlerge qoltutuv, informatsion siyasetini ilerletüv ve Qırımnıñ medeniy kimligini saqlamaqnı közde tutqan teşebbüsler aqqında aytıp berdi. O, kognitiv deokupatsiya meselelerini çezüvde, yañı yanaşmalarnı şekillendirüvde, hususan metanetli degerliklerni, birlik mefküresi ve milliy añlavnı şekillendirüvde yaşlarnıñ müim rol oynağanını qayd etti.

“Qırımnıñ onyıllıq işğali devamında informatsion ve medeniy boşluq sadece çağırı degil de, birligimizni saqlama qabiliyetimizniñ sınavı oldı. Tarih, insan aqları ve rus repressiyaları meselelerini yeterli derecede aydınlatılmağanı tek duşmannıñ işine yaray. Tek dialog, umumiy mirasımıznı añlav ve aktiv reintegratsiya vastasınen bizler işğalci memleketniñ müstemlekecilik siyasetiniñ aqibetlerini yeñip olurmız, — dep qayd etti Yevgen Bondarenko.

Muzakere devamında Qırımnıñ kognitiv deokupatsiyası boyunca Şura ekspertleri Martin-Oleksandr Kıslıy, Yuliya Tışçenko ve Dmıtro Teperik Qırım tarihınıñ emiyetine, kognitiv deokupatsiyanıñ ameliy taraflarına ve yarımadanıñ metanetli kelecegini  azırlavğa diqqat ayırdılar. Olarnıñ çıqışları Qırımnıñ ğayrıdan integratsiyası boyunca çalıimalarnıñ esas saalarını belgilemege yardım etti.

Yuliya Tışçenko kognitiv deokupatsiya ceryanında ilk vazifeni qayd etti: 

“Kognitiv deokupatsiya boyunca çalışmalarımıznıñ eñ müim taraflarından biri – işğal ve cenkniñ aqibetlerinen yeñmek ve – işğal etilgen topraqlarnıñ sakinleri, ukrain cemiyeti ile ukrain devleti arasında işançnı ğayrıdan tiklemek ve Qırımnen bağlı rus ve imperialist teşviqatınıñ tesirini yoq etmek”.

Martin-Oleksandr Kıslıy milliy kimlik añlamında Qırımnıñ simvolik emiyetini ifade etti:

“Qırım – keçmişimizni añlamaq ve Ukrainanıñ kelecegini şekillendirmek içün anahtardır. Bu asırlar devamında öz medeniyetini ve urf-adetlerini saqlap kelgen tamır halqlarnıñ vatanıdır. Bu iç bir vaqıt “asıl rus” olmağan ve olmaycaq bir topraqtır, çünki onıñ tarihı, ruhu kibi, ukrain halqınen ve onıñ serbestlik ile adalet içün küreşinen pek bağlıdır”.

Dmıtro Teperık Qırımnıñ kelecegini şekillendirgen sınavlar ve imkânlar aqqında söz yürsetti:

“Qırımnıñ kelecegi – bu, onıñ çoq qatlı tarihiy keçmişiniñ yükü, adalet ve serbestlik talap etken şimdiki zamannıñ çağıruvları ve tınç, birlik cemiyet qurulmasına ilham bergen ğayelerge ıntıluv arasındaki teñdeşliktir. Kelecekniñ körünişi absurd, mümkün ya da kerçekke beñzegen ola bile, amma aslında bu stsenariylerniñ qaysı birisi ömürge keçecegini bizim deokupatsiyağa, reintegratsiya ve Ukrainada qırım menliginiñ canlanmasına ıntıluvımız ve istegimiz belgiley. ”

İştirakçiler Qırımnıñ kelecegi ve Ukraina birliginen bağlı esas suallerge cevap bergen munaqaşa gruppalarında faal iştirak ettiler. Gençler milliy birlik olar içün ne añlamına kelgenini, Ukrainada nasıl mearetlerge cevap bermek kerekligini ve ne içün müim olğanını muzakere ettiler. Yaşlar Qırım rus işğalinden azat etilgen soñ peyda ola bilecek üç esas telüke ve cemiyet içün açılacaq yañı imkânlar aqqında da laqırdı ettiler. Ayrıca iştirakçiler işğal etilgen ve azat etilgen topraqlardaki yaşlarnıñ ortaq ve farqlı noqtalarını talil ettiler.

Tedbir Ukraina gençler ve sport nazirligi, Bütünkraina gençler merkezi, “Crimea Daily” media-teşebbüsi, “Cemaat” media-teşebbüsi, “Mediapatriotlar mektebi” ve “Stiyka Ukraina” cemaat teşkilatlarınıñ destegi ile Temsilcilik tarafından teşkil etildi.